ന്യൂഡല്‍ഹി: ക്രിക്കറ്റ് ലോകത്തെ ഒന്നാകെ ഞെട്ടിച്ചാണ് 2014 ഡിസംബര്‍ 30-ന് ഓസ്‌ട്രേലിയയിലെ മെല്‍ബണില്‍ വെച്ച് മുന്‍ ഇന്ത്യന്‍ ക്യാപ്റ്റന്‍ എം.എസ് ധോണി ടെസ്റ്റ് ക്രിക്കറ്റില്‍ നിന്ന് വിരമിക്കുന്നതായി പ്രഖ്യാപിച്ചത്. ഇന്ത്യന്‍ ഡ്രസ്സിങ് റൂമിനെ ഒന്നാകെ ഞെട്ടിച്ചധോണിയുടെ അന്നത്തെ പ്രഖ്യാപനത്തെ കുറിച്ചുള്ള ഓര്‍മകള്‍ പങ്കുവെയ്ക്കുകയാണ് മുന്‍ പരിശീലകനായിരുന്ന രവി ശാസ്ത്രി. ധോനിയുടെ തീരുമാനത്തെ കുറിച്ച് ആരും തന്നെ അറിഞ്ഞിരുന്നില്ലെന്ന് ശാസ്ത്രി പറഞ്ഞു. സ്റ്റാര്‍ സ്‌പോര്‍ട്‌സ് ചാനലിനോട് സംസാരിക്കവെയാണ് ശാസ്ത്രി അന്നത്തെ സംഭവങ്ങള്‍ ഓര്‍ത്തെടുത്തത്.
”അദ്ദേഹത്തിന് അറിയാമായിരുന്നു അടുത്ത ലീഡര്‍ ആരാണെന്നുള്ളത്. ആ പ്രഖ്യാപനത്തിന് ഉചിതമായ സമയത്തിനായി ധോണി കാത്തിരിക്കുകയായിരുന്നു. കാരണം എത്രകാലം കൂടി എന്ന്‌ അദ്ദേഹത്തിന് തന്നെ അറിയാമായിരുന്നു. വൈറ്റ് ബോള്‍ കരിയറില്‍ കുറച്ച് കാലം കൂടി തുടരണമെന്ന് ധോണിക്കുണ്ടായിരുന്നു. ഇത്രയും മതിയെന്ന് ശരീരം അദ്ദേഹത്തോട് പറയുന്നുണ്ടെങ്കില്‍ അത് മതി. രണ്ടാമതൊന്ന് ആലോചിക്കേണ്ട കാര്യമില്ല.” – ശാസ്ത്രി പറഞ്ഞു.
ടെസ്റ്റ് ക്രിക്കറ്റ് മതിയാക്കുന്നുവെന്ന് ധോണി പറഞ്ഞപ്പോള്‍ ഡ്രസ്സിങ് റൂമിലുണ്ടായിരുന്നവരുടെ മുഖം തനിക്ക് ഓര്‍മയുണ്ടെന്നും എല്ലാവരും തന്നെ ഞെട്ടലിലായിരുന്നുവെന്നും ശാസ്ത്രി കൂട്ടിച്ചേര്‍ത്തു. 2014-ല്‍ ടീമിന്റെ ഡയറക്ടറായി അന്ന് ഇന്ത്യന്‍ സംഘത്തിനൊപ്പം ശാസ്ത്രിയും ഉണ്ടായിരുന്നു.
