റിയാദ്: സൗദി അറേബ്യയിൽ കഴിഞ്ഞ ഇരുപത്തിനാല് മണിക്കൂറിനിടെ 2,779 പേർക്ക് കൂടി രോഗം സ്ഥിരീകരിച്ചതോടെ രാജ്യത്തെ ആകെ രോഗബാധിതർ 2.32ലക്ഷം കടന്നു. 232,259 പേർക്കാണ് ഇതുവരെ രോഗം സ്ഥിരീകരിച്ചത്. ഇതിൽ 167,138 പേർ രോഗമുക്തി നേടിയിട്ടുണ്ട്. ആരോഗ്യമന്ത്രാലയം പുറത്തുവിട്ട വിവരങ്ങൾ അനുസരിച്ച് 62,898 പേരാണ് നിലവിൽ ചികിത്സയിൽ തുടരുന്നത്.
റിയാദിൽ നിന്നാണ് കഴിഞ്ഞ ദിവസം ഏറ്റവും കൂടുതൽ കോവിഡ് കേസുകൾ റിപ്പോർട്ട് ചെയ്യപ്പെട്ടത്. 247 പേർക്കാണ് ഇവിടെ രോഗം സ്ഥിരീകരിച്ചത്. ജിദ്ദയിൽ 191 പേർക്കും രോഗം സ്ഥിരീകരിച്ചു.
ഒറ്റദിവസത്തിൽ 42 മരണങ്ങളും റിപ്പോർട്ട് ചെയ്യപ്പെട്ടിട്ടുണ്ട്. ഇതോടെ രാജ്യത്ത് കോവിഡ് ബാധിച്ച് മരിച്ചവരുടെ എണ്ണം 2,223 ആയി ഉയർന്നു. അതേസമയം ചികിത്സയിൽ കഴിയുന്നവരിൽ 2,245 പേരുടെ ആരോഗ്യനില മോശമാണെന്നും ആരോഗ്യമന്ത്രാലയം വക്താവ് അറിയിച്ചിട്ടുണ്ട്.
രാജ്യത്തെ രോഗബാധിതരിൽ മൂന്നിലൊന്ന് ശതമാനവും 40-60 വയസിന് ഇടയിൽ പ്രായമുള്ളവരാണ്. ഇതുവരെ റെക്കോഡ് ചെയ്യപ്പെട്ട കേസുകളിൽ 33% സ്ത്രീകളും 76% പുരുഷന്മാരുമാണെന്നും വക്താവ് ഡോ.അബ്ദുൾ അസീസ് അറിയിച്ചു.