അയർലണ്ടിൽ റോഡപകട മരണങ്ങൾ ആശങ്കാജനകമായ വർധിച്ചതിനെ തുടർന്ന് റോഡ് സുരക്ഷ മെച്ചപ്പെടുത്തുന്നതിനുള്ള ശ്രമങ്ങളുടെ ഭാഗമായി കൂടുതൽ റെഡ് ലൈറ്റ് ക്യാമറകൾ സ്ഥാപിക്കും. മുമ്പ് ഡബ്ലിനിൽ കുറച്ച് ക്യാമറകൾ സ്ഥാപിച്ചിരുന്നു. കഴിഞ്ഞ കുറേ വർഷങ്ങളായി അവ പ്രവർത്തനരഹിതമാണ്. കഴിഞ്ഞ വർഷം, പദ്ധതിയുടെ മേൽനോട്ടം വഹിക്കുന്ന നാഷണൽ ട്രാൻസ്‌പോർട്ട് അതോറിറ്റി (എൻടിഎ) ഡബ്ലിനിലെ ബ്ലാക്ക്‌ഹാൾ പ്ലേസിലെ അത്തരത്തിലുള്ള ഒരു ക്യാമറ 2016 മുതൽ പ്രവർത്തിക്കുന്നില്ലെന്ന് സ്ഥിരീകരിച്ചു. മറ്റ് രണ്ട് ക്യാമറകൾ ഇതുവരെ സ്ഥാപിച്ചിട്ടില്ലെന്നും കൂട്ടിച്ചേർത്തു.
സിഗ്നൽ ലംഘിക്കുന്ന ഡ്രൈവർമാർക്ക് ലൈസൻസിൽ മൂന്ന് പെനാൽറ്റി പോയിൻ്റുകൾ ലഭിക്കും. കൂടാതെ 80 യൂറോ പിഴയും. റോഡ് സുരക്ഷ മെച്ചപ്പെടുത്തുന്നതിനുള്ള സംസ്ഥാനത്തിൻ്റെ ശ്രമങ്ങളുടെ ഭാഗമാണ് റെഡ് ലൈറ്റ് ക്യാമറകൾ എന്നും ഈ വർഷം അവസാനവും അടുത്ത വർഷം ആദ്യവും ഇവ സ്ഥാപിക്കുമെന്നും ഗതാഗത മന്ത്രി ഇമോൺ റയാൻ പറഞ്ഞു. ഈ വർഷം ഇതുവരെയുണ്ടായ ഉയർന്ന റോഡപകട മരണങ്ങളെക്കുറിച്ച് ചർച്ച ചെയ്യാൻ Taoiseach സൈമൺ ഹാരിസും മന്ത്രിമാരും റോഡ് സുരക്ഷാ അതോറിറ്റിയുമായി (ആർഎസ്എ) കൂടിക്കാഴ്ച നടത്താനിരിക്കെയാണ് റയാന്റെ പ്രസ്താവന. അയർലണ്ടിൽ 2024-ൻ്റെ തുടക്കം മുതൽ റോഡുകളിൽ 60-ലധികം ആളുകൾ മരണപ്പെട്ടു.
