അയർലണ്ടിൽ വീടുകളുടെ നവീകരണത്തിനും വിപുലീകരണ പ്രവർത്തനങ്ങൾക്കുമായി എടുക്കുന്ന മോർട്ട്ഗേജ് ടോപ്പ്-അപ്പ് വായ്പകൾ 16 വർഷത്തിനിടയിലെ ഏറ്റവും ഉയർന്ന നിലയിലെത്തിയതായി മോർട്ട്ഗേജ് സ്വിച്ചിങ് സേവനമായ Doddl.ie. അനുയോജ്യമായ വീടുകളുടെ ലഭ്യതക്കുറവ് കാരണം പുതിയ വീട് വാങ്ങി മാറുന്നതിന് പകരം നിലവിലെ വീടുകളിൽ തന്നെ തുടരാൻ കൂടുതൽ കുടുംബങ്ങൾ തീരുമാനിക്കുന്നതാണ് ടോപ്പ്-അപ്പ് വായ്പകളുടെ വർധനയ്ക്ക് പ്രധാന കാരണമെന്ന് റിപ്പോർട്ട് ചൂണ്ടിക്കാട്ടുന്നു.
Join GNN24X7 IRELAND Whatsapp Group 🔗 https://chat.whatsapp.com/HCHNSM0uwJ54sRAzNI1ur2
Doddl.ie, Irish Independentനുമായി സഹകരിച്ച് തയ്യാറാക്കുന്ന ത്രൈമാസ Mortgage Switching Index ആണ് ഇതുസംബന്ധിച്ച കണക്കുകൾ പുറത്തുവിട്ടത്. വീട് മാറ്റുന്നതിന് പകരം നിലവിലെ വീടുകൾ നവീകരിക്കാനും വിപുലീകരിക്കാനും കൂടുതൽ പേർ വായ്പയെടുക്കുന്നതാണ് ഇതിന് പിന്നിൽ. ഇതിന്റെ ഭാഗമായി നിലവിലെ മോർട്ട്ഗേജ് ദാതാവിൽ നിന്ന് തന്നെ അധിക തുക വായ്പയായി എടുക്കുന്നവരുടെ എണ്ണവും വർധിച്ചിട്ടുണ്ട്.
മോർട്ട്ഗേജ് സ്വിച്ചിങ് ഇടപാടുകളുടെ മൊത്തം മൂല്യം കഴിഞ്ഞ വർഷത്തെ അപേക്ഷിച്ച് ഏകദേശം 25 ശതമാനം ഉയർന്നതായും കണക്കുകൾ വ്യക്തമാക്കുന്നു. 2003ൽ രേഖകൾ ആരംഭിച്ചതിന് ശേഷമുള്ള ഏറ്റവും ഉയർന്ന നിലയാണിത്. രണ്ടാം പാദത്തിൽ മോർട്ട്ഗേജ് സ്വിച്ച് ചെയ്തവരുടെ ശരാശരി വായ്പാ തുക €309,666 ആയി ഉയർന്നു. നിലവിലെ ബാങ്കിൽ നിന്ന് മാത്രം ടോപ്പ്-അപ്പ് വായ്പ എടുക്കുന്നതിന് പകരം വിപണിയിലെ വിവിധ വായ്പാ നിരക്കുകൾ താരതമ്യം ചെയ്യണമെന്ന് Doddl.ie ഉപഭോക്താക്കളോട് നിർദേശിക്കുന്നു. നിലവിലെ ബാങ്കിൽ നിന്ന് തന്നെ ടോപ്പ്-അപ്പ് എടുക്കുമ്പോഴും പുതിയ മോർട്ട്ഗേജ് എടുക്കുന്നതിനോട് സമാനമായ നടപടിക്രമങ്ങളാണ് പലപ്പോഴും ആവശ്യമായി വരുന്നതെന്നും സേവനം ചൂണ്ടിക്കാട്ടുന്നു.
ശമ്പള സർട്ടിഫിക്കറ്റുകൾ, മൂല്യനിർണയ രേഖകൾ, മറ്റ് ആവശ്യമായ രേഖകൾ എന്നിവ അപേക്ഷകർ വീണ്ടും സമർപ്പിക്കേണ്ടി വരും. അതിനാൽ ടോപ്പ്-അപ്പ് എടുക്കുന്നതിനൊപ്പം മറ്റ് ബാങ്കുകളുടെ നിരക്കുകളും പരിശോധിക്കുന്നത് സാമ്പത്തികമായി കൂടുതൽ പ്രയോജനകരമായേക്കാം. വിപണിയിലെ ഏറ്റവും ഉയർന്നതും കുറഞ്ഞതുമായ മോർട്ട്ഗേജ് പലിശനിരക്കുകൾ തമ്മിൽ മൂന്ന് ശതമാനം പോയിന്റിലധികം വ്യത്യാസമുണ്ടാകാമെന്നും Doddl.ie പറയുന്നു. കൂടുതൽ തുക വായ്പയെടുക്കാൻ ഉദ്ദേശിക്കുന്ന വീട്ടുടമകൾ നിരക്കുകൾ താരതമ്യം ചെയ്യാതെ നിലവിലെ ബാങ്കിൽ തുടരുകയാണെങ്കിൽ വലിയ തുക അധികമായി നൽകേണ്ടി വരാം.
€358,212 മോർട്ട്ഗേജിന്റെ കാര്യത്തിൽ ഏറ്റവും ഉയർന്നതും കുറഞ്ഞതുമായ പലിശനിരക്കുകൾ തമ്മിലുള്ള വ്യത്യാസം പ്രതിമാസം ഏകദേശം €642 വരെയാകാം. വർഷത്തിൽ ഇത് ഏകദേശം €7,706 ആയി ഉയരും. വീട് നവീകരിക്കുന്നതിനായി വായ്പ എടുക്കുമ്പോൾ നിലവിലെ വായ്പാദാതാവിൽ തന്നെ തുടരുന്നത് പല മോർട്ട്ഗേജ് ഉടമകളും ചെയ്യുന്ന പിഴവാണെന്ന് Doddl.ie CEO Martina Hennessy പറഞ്ഞു. വിപുലീകരണത്തിനായി €80,000 ലഭിക്കുമോ എന്നതിൽ മാത്രം ശ്രദ്ധ കേന്ദ്രീകരിക്കുന്നതിന് പകരം ആ തുക ഏറ്റവും കുറഞ്ഞ ചെലവിൽ എങ്ങനെ കണ്ടെത്താമെന്നതാണ് പ്രധാനമായി പരിശോധിക്കേണ്ടതെന്ന് അവർ പറഞ്ഞു.
ടോപ്പ്-അപ്പ് മോർട്ട്ഗേജിനെ പലരും വെറും ഭരണപരമായ നടപടിയായി കാണുന്നതിനാൽ നിലവിലെ മോർട്ട്ഗേജിന്റെ മുഴുവൻ വ്യവസ്ഥകളും പുനഃപരിശോധിച്ച് പലിശയിൽ ലാഭിക്കാനുള്ള അവസരം നഷ്ടപ്പെടുത്തുന്നുണ്ടെന്നും Hennessy ചൂണ്ടിക്കാട്ടി. വീട് വാങ്ങുന്നതുമായി ബന്ധപ്പെട്ട ഇടപാടല്ലാത്തതിനാൽ മോർട്ട്ഗേജ് സ്വിച്ചിങ് വഴി നിലവിലെ വായ്പ മറ്റൊരു ദാതാവിലേക്ക് മാറ്റി പലിശച്ചെലവിൽ ലാഭം നേടാൻ വീട്ടുടമകൾക്ക് കഴിയുമെന്നും അവർ കൂട്ടിച്ചേർത്തു.
Follow the GNN24X7 IRELAND channel on WhatsApp: https://whatsapp.com/channel/0029Va4AM6UElagtUTDuQQ0S
Follow Us on Instagram!
GNN24X7 IRELAND :
🔗 https://www.instagram.com/gnn24x7.ie?igsh=YzljYTk1ODg3Zg==
