കൊല്ലം: ഉത്ര വധക്കേസില് പ്രതി സൂരജിന്റെ അമ്മ രേണുകയെയും സഹോദരിയെയും പൊലീസ് കസ്റ്റഡിയിലെടുത്തു. പുനലൂര് പൊലീസാണ് ഇവരെ കസ്റ്റഡിയിലെടുത്തത്. ചോദ്യം ചെയ്യല് പൂര്ത്തിയായ ശേഷമാവും അറസ്റ്റ് സംബന്ധിച്ച തീരുമാനമുണ്ടാവുക.
കുഴിച്ചിട്ട സ്വര്ണം മുഴുവന് ഉത്രയുടേത് തന്നെയാണെന്ന് സൂരജിന്റെ അമ്മ സമ്മതിച്ചു. ഉത്രയുടെയും സൂരജിന്റെയും വിവാഹ ആല്ബവുമായാണ് ഇവരെ ക്രൈംബ്രാഞ്ചിന്റെ ഓഫീസില് എത്തിച്ചത്. ഇവരെ കൂടുതല് ചോദ്യം ചെയ്യലിന് വിധേയരാക്കുമെന്നാണ് വിവരം. ഇവര്ക്കെതിരെ ഗാര്ഹിക പീഡനത്തിന് കേസെടുത്തിരുന്നു.
സൂരജിന്റെ അച്ഛന് സുരേന്ദ്രനെ തിങ്കളാഴ്ച അറസ്റ്റ് ചെയ്തിരുന്നു. സൂരജിനെയും സുരേന്ദ്രനെയും ക്രൈംബ്രാഞ്ച് ഒരുമിച്ചിരുത്തി ചോദ്യം ചെയ്തു. സുരേന്ദ്രന് പൊലീസിന് കാണിച്ചുകൊടുത്ത കുഴിച്ചിട്ട 38 പവന് ഉത്രയുടേത് തന്നെയാണെന്ന് ഇവര് സമ്മതിച്ചിട്ടുണ്ടെന്നാണ് വിവരം. സ്വര്ണം കുഴിച്ചിട്ട വിവരം രേണുകയ്ക്കും അറിയാമായിരുന്നെന്നും ഇവര് വെളിപ്പെടുത്തി. റൂറല് എസ്.പിയുടെ നേതൃത്വത്തിലായിരുന്നു ചോദ്യം ചെയ്യല്.
തെളിവ് നശിപ്പിക്കല്, ഗൂഡാലോചന, ഗാര്ഹിക പീഡനം എന്നിവ ചുമത്തിയാണ് സുരേന്ദ്രനെതിരെ കേസെടുത്തിരിക്കുന്നത്.
സ്വര്ണം കുഴിച്ചിട്ടതിലടക്കം സൂരജിന്റെ കുടുംബത്തിന് പങ്കുണ്ടെന്നാണ് ഉത്രയുടെ അച്ഛന് വിജയ സേനന് ആരോപിക്കുന്നത്. കൂടുതല് സ്വര്ണം കണ്ടെത്താനുണ്ട്. എല്ലാം സൂരജിന്റെ അമ്മയുടെയും സഹോദരിയുടെയും അറിവോടെയാണെന്നും ഇദ്ദേഹം ആരോപിച്ചു.