ദുബായ്: യു.എ.ഇ. അംഗീകരിച്ച കോവിഡ് പ്രതിരോധ വാക്സിന് സ്വീകരിച്ച താമസവിസയുള്ള ഇന്ത്യക്കാര്ക്ക് വ്യാഴാഴ്ച മുതല് നിബന്ധനകളോടെ യു.എ.ഇ.യിലേക്ക് തിരിച്ചുവരാമെന്ന രീതിയിൽ യാത്രാ തടസ്സം താത്കാലികമായി നീക്കി. യു.എ.ഇയില് വെച്ച് രണ്ടു ഡോസ് വാക്സിനുകളും എടുത്തവര്ക്കാണ് ആദ്യഘട്ടത്തില് രാജ്യത്തേക്ക് നേരിട്ട് കടക്കാൻ അനുമതിയുള്ളത്. വാക്സിന് രണ്ടാം ഡോസെടുത്തിട്ട് 14 ദിവസം പിന്നിട്ടിവരാകണമെന്നും നിര്ദേശമുണ്ട്. ഇന്ത്യയില്നിന്ന് വാക്സിനെടുത്തവരെ അടുത്ത ഘട്ടത്തിലേ പരിഗണിക്കൂവെന്നാണ് റിപ്പോർട്ടുകൾ. വിമാന കമ്പനികള്ക്കും മറ്റും നല്കിയ നിര്ദേശത്തിലാണ് അധികൃതര് ഇക്കാര്യത്തില് വ്യക്തത വരുത്തിയിരിക്കുന്നത്.
യു.എ.ഇയില് ജോലി ചെയ്യുന്ന ഡോക്ടര്മാര്, നഴ്സുമാര്, ടെക്നീഷ്യന്സ് എന്നിവരുള്പ്പെടുന്ന ആരോഗ്യ പ്രവര്ത്തകര്, സര്വകലാശാലകള്, കോളേജുകള്, മറ്റ് വിദ്യാഭ്യാസ സ്ഥാപനങ്ങള് എന്നിവിടങ്ങളില് പ്രവര്ത്തിക്കുന്നവര്, വിദ്യാര്ഥികള്, മാനുഷിക പരിഗണന നല്കേണ്ടവരില് സാധുവായ താമസവിസയുള്ളവര്, ഫെഡറല്, ലോക്കല് ഗവ. ഏജന്സികളില് പ്രവര്ത്തിക്കുന്നവര് എന്നീ വിഭാഗങ്ങളില്പ്പെട്ട എല്ലാവര്ക്കും ഓഗസ്റ്റ് അഞ്ചു മുതല് യു.എ.ഇയിലേക്ക് മടങ്ങാം.
ഡോക്ടര്മാര്, നഴ്സുമാര്, അധ്യാപകര് എന്നിവര്ക്ക് വാക്സിനേഷന് നിര്ബന്ധമില്ല.
