ശ്രീനഗർ: കാശ്മീരിൽ സൈനിക സംഘത്തെ ലക്ഷ്യം വച്ച് ഭീകരർ നടത്തിയ ആക്രമണത്തിൽ ഒരു ജവാൻ ഉൾപ്പെടെ രണ്ട് പേർ കൊല്ലപ്പെട്ടു. സിഎആർപിഎഫ് ജവാനും വഴിയാത്രക്കാരനായ ഒരു മധ്യവയസ്കനും ആണ് കൊല്ലപ്പെട്ടത്.
ബരാമുള്ളയിലെ സോപോർ മേഖലയിൽ ഇന്ന് രാവിലെ ഏഴരയോടെയായിരുന്നു സംഭവം. ഇവിടെ ഒരു ചെക്പോസ്റ്റ് ലക്ഷ്യം വച്ച് നടത്തിയ ആക്രമണത്തിലാണ് ജവാനും വഴിയാത്രക്കാരനും കൊല്ലപ്പെട്ടത്. പൊലീസ് സേനാംഗങ്ങളും ആ സമയത്ത് ഇവിടെ ഡ്യൂട്ടിക്കുണ്ടായിരുന്നു. സുരക്ഷ സേന പ്രത്യാക്രമണം നടത്തിയതായി സൈനിക വൃത്തങ്ങൾ അറിയിച്ചു.
ഇതിനിടെ ആക്രമണത്തിൽ കൊല്ലപ്പെട്ടയാൾക്കൊപ്പമുണ്ടായിരുന്ന മൂന്ന് വയസുകാരനെ സൈന്യം രക്ഷപ്പെടുത്തിയിരുന്നു. ഈ കുട്ടിയുടെ ദൃശ്യങ്ങൾ ഇപ്പോൾ സോഷ്യൽ മീഡിയയിൽ പ്രചരിക്കുന്നുണ്ട്.
