കോട്ടയം: സാമൂഹിക അകലം അടക്കമുള്ള കൊവിഡ് നിയന്ത്രണങ്ങള്‍ ലംഘിച്ച് കോട്ടയത്ത് നഴ്‌സുമാരുടെ അഭിമുഖം. കോട്ടയം ജില്ലാ ആശുപത്രിയിലാണ് നഴ്‌സ് നിയമനത്തിനായുള്ള അഭിമുഖത്തില്‍ പങ്കെടുക്കാന്‍ നൂറുകണത്തിന് ആളുകളെത്തിയത്.
ആശുപത്രിയുടെ മതിലിന് അകത്തും പുറത്തുമായി വരിനില്‍ക്കുന്ന ഇവര്‍ കൃത്യമായ അകലമോ മറ്റ് നിര്‍ദ്ദേശങ്ങളോ പാലിച്ചിട്ടില്ല. കോട്ടയത്തെ കൊവിഡ് ആശുപത്രിയാണിത്. ആശുപത്രിയില്‍ നിലവില്‍ കൊവിഡ് രോഗികളില്ലെന്നാണ് വിവരം.
ഉദ്യോഗാര്‍ത്ഥികളുടെ ക്യൂ നീണ്ടതോടെ ആംബുലന്‍സുകള്‍ക്ക് പോലും കടന്നുപോകാന്‍ കഴിയാത്ത അവസ്ഥയുണ്ടായി. തുടര്‍ന്ന് പൊലീസ് സ്ഥലത്തെത്തി ഗതാഗതം നിയന്ത്രിച്ചു.
ഒരു മാസത്തെ താല്‍ക്കാലിക ഒഴിവിലേക്കാണ് അഭിമുഖം. 21 ഒഴിവുകളാണുള്ളത്. എന്നാല്‍ ഇത്രയധികം പേര്‍ എത്തുമെന്ന് കരുതിയില്ലെന്നാണ് ജില്ലാ മെഡിക്കല്‍ ഓഫീസറുടെ പ്രതികരണം. അഭിമുഖം നിര്‍ത്തിവെക്കാന്‍ നിര്‍ദ്ദേശം നല്‍കിയിരിക്കുകയാണെന്നും അദ്ദേഹം അറിയിച്ചു.
