ബ്ലൂംഫോണ്ടെയ്ന്‍ (ദക്ഷിണാഫ്രിക്ക): അണ്ടര്‍ 19 ലോകകപ്പില്‍ ഇന്ത്യയ്ക്ക് വിജയതുടക്കം. ശ്രീലങ്കയെ 90 റണ്‍സിനാണ് ഇന്ത്യ പരാജയപെടുത്തിയത്. ടോസ് നേടിയ ശ്രീലങ്ക ഇന്ത്യയെ ബാറ്റിങ്ങിന് അയക്കുകയായിരുന്നു.ഇന്ത്യ നിശ്ചിത 50 ഓവറില്‍ നാല് വിക്കറ്റ് നഷ്ടത്തില്‍ 297 റണ്‍സ് സ്വന്തമാക്കി. മറുപടി ബാറ്റിങ്ങിനിറങ്ങിയ ശ്രീലങ്കയുടെ ഇന്നിങ്ങ്സ് 45.2 ഓവറില്‍ 207 റണ്‍സിന് അവസാനിച്ചു.
ഇന്ത്യന്‍ നിരയില്‍ മൂന്ന് പേരാണ് അര്‍ധ സെഞ്ച്വറി സ്വന്തമാക്കിയത്. 59 റണ്‍സെടുത്ത ഓപണര്‍ യശ്വസി ജെസ്വളാണ് ഇന്ത്യന്‍ നിരയിലെ ടോപ്‌ സ്കോറര്‍. ക്യാപ്റ്റന്‍ പ്രിയം ഗാര്‍ഗ് 56 റണ്‍സും ധ്രുവ് ജുറെല്‍ 52 റണ്‍സും നേടി.തിലക് വര്‍മ്മ 46 റണ്‍സും സിദ്ധേഷ് വീര്‍ 44 റണ്‍സുമെടുത്തു. പിന്നീട് ലങ്കന്‍ നിരയിലെ രണ്ട് വിക്കറ്റുകള്‍ വീഴ്ത്തുകയും ചെയ്ത സിദ്ധേഷ് വീര്‍ കളിയിലെ താരമായി.
ശ്രീലങ്കന്‍ നിരയില്‍ 50 റണ്‍സെടുത്ത ക്യാപ്റ്റന്‍ നിപുന്‍ ധഞ്ജയ യാണ് ടോപ്‌ സ്കോറര്‍.കമില്‍ 39 റണ്‍സും രസന്ത 49 റണ്‍സുമെടുത്തു. വെറും 26 റണ്‍സിനിടെയാണ് ശ്രീലങ്കയുടെ അവസാന ആറു വിക്കറ്റുകള്‍ നഷ്ടമായത്. ഇന്ത്യക്ക് വേണ്ടി ആകാശ് സിംഗ്,സിദ്ധേഷ് വീര്‍,രവി ബിഷ്ണോയി എന്നിവര്‍ രണ്ടും. കാര്‍ത്തിക് ത്യാഗി,സുശാന്ത് മിശ്ര,യശ്വസി ജെയ്സ്വാള്‍ എന്നിവര്‍ ഓരോ വിക്കറ്റും സ്വന്തമാക്കി. ഇന്ത്യയുടെ അടുത്ത മത്സരം ജപ്പാനെതിരെ ജനുവരി 21 നാണ്
