തിരുവനന്തപുരം: ചൈനയിലെ വുഹാനിൽ നിന്നും കൊറോണ (Covid 19) വൈറസ് ലോകമെമ്പാടും പടർന്നു പിടിക്കുന്ന സാഹചര്യത്തിൽ ജനങ്ങളിൽ ബോധവൽക്കരണം നടത്താൻ കേരള പൊലീസ് തയ്യാറാക്കിയ ഡാൻസ് വീഡിയോ ലോക മാധ്യമങ്ങളിൽ തരംഗമാകുന്നു.
ഈ വീഡിയോ നിരവധി അന്തർദേശീയ മാധ്യമങ്ങൾ പ്രക്ഷേപണം ചെയ്തിട്ടുണ്ട്. കൂടാതെ യുഎസ് എംബസിയുടെ അഭിനന്ദനവും ഇപ്പോൾ കേരളാ പൊലീസിനെ തേടിയെത്തിയിരിക്കുകയാണ്. വീഡിയോയിൽ ചുവടുവെച്ചിരിക്കുന്നത് മീഡിയ സെന്ററിലെ പൊലീസുകാരായ ഷിഫിൻ സി രാജ്, വി. വി . അനൂപ് , എം . വി. ഹരിപ്രസാദ്, രതീഷ് ചന്ദ്രൻ എന്നിവരാണ്.
വീഡിയോ ചിത്രീകരിച്ചിരിക്കുന്നത് പൊലീസ് മീഡിയ സെന്റർ ഡെപ്യൂട്ടി ഡയറക്ടർ വി. പി. പ്രമോദ് കുമാറിന്റെ നേതൃത്വത്തിലാണ്. ഈ സംരംഭത്തിൽ മീഡിയ സെന്ററിലെ ജീവനക്കാരായ എസ് . എൽ. ആദർശും, ബി. വി. കലയും പങ്കാളികളായിരുന്നു.
ക്യാമറയും, എഡിറ്റിങ്ങും നടത്തിയിരിക്കുന്നത് മറ്റൊരു ജീവനക്കാരനായ ഹേമന്ദ് ആർ നായരാണ്. ഈ വീഡിയോ മുഖ്യമന്ത്രി പിണറായി വിജയൻ തന്റെ ഫെയ്സ്ബുക്കിൽ ഷെയർ ചെയ്തിരുന്നു. ഇന്ത്യയിലെ എല്ലാ ചാനലുകളും, ഓൺലൈൻ ന്യൂസ് പോർട്ടലുകളും ഈ വീഡിയോ പങ്കുവെച്ചിരുന്നു. തുടർന്ന് അന്തർദേശീയ വാർത്താ ഏജൻസികളായ എ.എഫ്.പി, എഎൻഐ, റോയിട്ടേഴ്സ് എന്നിവരും ഈ വീഡിയോ പങ്കുവെക്കുകയായിരുന്നു. കൂടാതെ ബിബിസി, റഷ്യ ടു ഡേ, ഫോക്സ് ന്യൂസ് 5, സ്കൈ ന്യൂസ്, സൗത്ത് ചൈന മോണിങ് പോസ്റ്റ് തുടങ്ങീ പല വിദേശ മാധ്യമങ്ങളും ഈ വീഡിയോ ഷെയർ ചെയ്യുകയും വാർത്തകൾ നൽകുകയും ചെയ്തിരുന്നു.
വീഡിയോ കാണാം:
https://www.facebook.com/PinarayiVijayan/videos/677747602767865/