മുംബൈ: മുംബൈയിലെ ഖാർ പ്രദേശത്ത് പുതുവത്സരാഘോഷത്തിനിടെ 19 കാരി കൊല്ലപ്പെട്ട നിലയിൽ. മുംബൈയിൽ സുഹൃത്തിന്റെ വീട്ടിൽ ന്യൂഇയർ ആഘോഷത്തിനെത്തിയ ജാൻവി കുക്റേജ എന്ന യുവതിയാണ് കൊല്ലപ്പെട്ടത്. സംഭവത്തിൽ പെൺകുട്ടിയുടെ കാമുകനെയും ഒരു സുഹൃത്തിനെയും കസ്റ്റഡിയിലെടുത്തിട്ടുണ്ട്. കാമുകൻ ശ്രീ ജോഗ്ധന്കർ (22), ജാൻവിയുടെ കൂടെ സുഹൃത്തായ ദിവ്യ പടന്കർ (19) എന്നിവരെയാണ് കസ്റ്റഡിയിലെടുത്തത്.
ന്യൂഇയർ ആഘോഷത്തിനിടയിൽ ജാൻവിയുടെ കാമുകനെയും സുഹൃത്തായ ദിവ്യയെയും അരുതാത്ത സാഹചര്യത്തിൽ കണ്ടു. ഇത് ജാൻവി ചോദ്യം ചെയ്യുകയും അതിനെ തുടർന്നുള്ള വാക്ക് തർക്കമാണ് ജാൻവിയുടെ കൊലപാതകത്തിലേക്കെത്തിയത്. കാമുകനായ യുവാവ് പരിക്കേറ്റ നിലയിൽ കെട്ടിടത്തിൽ നിന്നും പോകുന്ന സിസിറ്റിവി ദൃശ്യങ്ങൾ കണ്ടെടുത്തതായി പൊലീസ് വ്യക്തമാക്കി. കാമുകനെയും സുഹൃത്തിനെയും പോലീസ് ചോദ്യം ചെയ്തു വരികയാണ്.