റോം: യൂറോ കപ്പിൽ രണ്ടാം മത്സരത്തിലും ജയിച്ച് ഇറ്റലി പ്രീക്വാർട്ടറിൽ. എ ഗ്രൂപ്പ് മത്സരത്തിൽ സ്വിറ്റ്സർലൻഡിനെയാണ് ഇറ്റലി 3-0നു തകർത്തത്.
ഇറ്റലിക്കായി ക്യാപ്റ്റൻ ജോർജിയോ ചില്ലെനി 19-ാം മിനിറ്റിൽ സ്വിസ് വലയിൽ പന്തെത്തിച്ചെങ്കിലും ലൊറൻസോ ഇൻസിനെയുടെ കോർണറിൽനിന്നു ഗോൾ നേടും മുൻപ് പന്ത് ചില്ലെനിയുടെ കയ്യിൽ തട്ടിയതിനാൽ വിഎആർ പരിശോധനയിൽ ഗോൾ നഷ്ടമായി.
മാനുവൽ ലൊകാറ്റെല്ലി (26’, 53’), സീറോ ഇമ്മൊബിലെ (89’) എന്നിവരാണ് ഇന്നലെ ഇറ്റലിയുടെ ഗോളുകൾ നേടിയത്. ലൊകാറ്റെല്ലിയുടെ ആദ്യഗോളിലൂടെ ഇറ്റലി മുന്നിലെത്തുകയായിരുന്നു. കളി അവസാനിക്കാൻ മിനിറ്റുകൾ ബാക്കി നിൽക്കെ സിറോ ഇമ്മൊബിലെ ഗോൾപ്പട്ടിക പൂർത്തിയാക്കുകയായിരുന്നു.